ERNIOKO MAGALEAN

XX. mendearen lehen erdiko Gipuzkoan dultzaina eta akordeoiarekin egiten zen musikari zuzendua dago disko hau, zehazki plazan dantzatzeko egiten zen musikari. Aukeratutako piezak garai hartako gipuzkoar dultzaineroen errepertoriotik hartu dira.

Disko liburu honen argitarapenarekin hainbat hamarkadetan zehar Juan Mari Beltran musikariak gipuzkoar dultzaineroen musikari buruz egin duen bilketa eta ikerketa lana burutu dela esan daiteke.

Egitarauak Gipuzkoako herrietako plaza eta dantzarako topaleku haietan dantzatzen ziren erritmo eta dantza moten hautaketa bat biltzen du: dantza herrikoiak diren jota eta fandangoak porrusalda, arin-arin eta kalejiren ondoan, eta dantza “unibertsalak” izan daitezkeen bals, txotis, mazurka, habanera, pasodobleak,... baita garai hartan dantza berria izanik Amerikatik iritsi zen fox-trot bat edo beste.