Oiartzungo Haurkultur Zikloa abiatzeko Alaia Belaunzaran harpa joleak eta Entrebescant taldeko beste musikariek emango dute kontzertu hau.

Taldea osatzen dutenak Erdi Aroko eta Iberiar Penintsulako ondare tradizionalak sortzen dien interesagatik elkartu diren bost musikari eta ikertzaile gazte dira. Beraien ustez garrantzitsuak diren egoera sozialak erakusteko helburuarekin, Erdi Aroa bere berezko musikaren bidez behatu eta aztertzen dute. Alaia Belaunzaran, Livia Camprubí, Bea Peña, Pablo F. Cantalapiedra eta Víctor Gallegok Erdi Aroan jotzen ziren soinu-tresnen erreprodukzioak jotzen dituzte: harpa, fidula, zarrabetea, flauta eta perkusiozko hainbat soinu-tresna. Deserriko kantua izeneko emanaldian Cid zaldunaren deserriko eresia kantatuko dute, musulmanen mendeko lurrak birkonkistatzera joan zen garaiko bere bizipenak gogoratzen dituena.

Kontzertuko sarrera doakoa izango da, baina Oiartzungo udaletxeko areto nagusian sartzeko gonbidapena eraman beharko da. Hura eskuratzeko jarraitu lotura: GONBIDAPENA.

Erne! Entrebescant taldeak kontzertu honetaz gain, irailaren 20an, ostirala, beste kontzertu bat emango du Oiartzungo Landetxe kultur aretoan. Haren izenburua Nafar erresumaren historia musikatua da eta arratsaldeko zortzietan emango dute. Sarrerak HEMEN har daitezke.